آكل أغلى آيس كريم في العالم
أتذكّر يوم كنّا نسوّي رحلة سفاري ويّا العيلة. سوّينا حاجات تهبل. وفي يوم أخوي تحدّاني. وأنا ما أقدر حدّ يتحدّاني وما أنجح في التحدّي. قال لي: «تقدرين تروّحين في الأدغال ويّا الأسود والنمور؟» بصراحة حين قال الكلام ده خفت بسّ مع أخوي ما أقدر أقول «لا». وفي اليوم الثاني روّحنا في رحلة سفاري في عمري في حياتي ما أنساها. تريدين الصدق؟ خفت كثير بس كنت أضحك وأحاول أنسى إنّه ممكن الحيوانات المفترسة تهاجمنا. وطبعاً ما كنت أقدر أظهر خوفي وأخوي يجلس جنبي. وتريدين الصدق كمان؟ أقول له شكراً لأنّه تحدّاني وخلّاني أسوّي حاجات ما كنت أتخيّل إنّي أسوّيها في يوم.
اقرئي: تخلّي عن الأجهزة الذكيّة واستمتعي في هذه المنتجعات
ودحين بفضل تحدّي ثاني تلاقيني أجلس في أفخم مقاهي دبي وأنتظر يقدّمون لي حاجة مرّة فاخرة، خياليّة. من يومين ثلاثة أخوي سألني: «هيا، أتحدّاك تسوين حاجة عجيبة غريبة. ومثل العادة قبلت التحدّي. وسوّيت بحث في الإنترنت عشان أعرف إيش هيّ الحاجة اللي ممكن تخلّيني أنجح في التحدّي. و... الآيس كريم الأغلى في العالم حضر، هنا على الطاولة قدّامي في المقهى في دبي. بعد ثواني رايحة آكل «الماس الأسود». يسمّونه كده. شكله يهبل حتى إنّي قلت يا ريته ما يذوب وأقدر أخلّيه مثل تحفة أزيّن بيها الطاولة الصغيرة في غرفتي. وكده تكتمل مجموعة ديكورها الغريبة العجيبة. فين جوّالي؟ لازم ألتقط صور للآيس كريم. وكمان لو أقدر أسوّي معاه «سيلفي». وكده أخوي رايح يصدّق بالدليل القاطع إنّي أكلت بوظة من ذهب. أيوه الآيس كريم بيه ذهب 23 قيراط بس تقدرين تاكلينه. وقرأت أمس في موقع مجلّة إنّه مصنوع من الزعفران الإيراني والكمأة الإيطاليّة السوداء و... انتظري، كتبت المعلومات على مفكّرتي وأريد أقرأها... والفانيلا المستودرة من مدغشقر وثمنها 2999 درهم يعني تقريباً 800 دولار.
اقرئي: الجوّال… مفيد أو مو مفيد؟
أحسّ الملعقة الأولى رايحة تكون مغامرة مو عاديّة... الثواني تمرّ وأنا أعدّها وأفكّر: معقول آكل الجوهرة الفاخرة ديّة؟ كمان صورة من زاوية مختلفة. صورة الوداع. و... الملعقة الأولى... وأحسّ شارع جميرا وحديقة أمّ سقيم القريبة كلّه يتحوّل لعالم من النكهات. تتذكّرين في أفلام الكرتون القرية اللي بيوتها وأشجارها وكل حاجة بيها مصنوعة من الحلويات؟ أحسّ منطقة المقهى كده. هي الملعقة الأولى بسّ اللي خلّتني أصير مثل أليس في بلاد العجائب. ملعقة ثانية. أريد أحسّ بنكهة كل مكوّن. حاجة فاخرة، فخمة، مو عاديّة... المعلقة الثالثة... أتصوّر إنّه الذهب والمكوّنات رايحين يمشون في خلايا جسمي وشكلي رايح يتحوّل، مثل قصص الخيال... شعر طويل مثل ربانزل وملابس بألوان كثيرة مثل ساندريلا. أنتظر قبل ما آكل الملعقة الرابعة... في الآيس كريم ده لكل ملعقة معنى وقصّة. ومع كل ملعقة تحسّين إنّك تكتشفين نكهة جديدة، سرّ جديد. الملعقة الخامسة... أخوي خسر التحدّي.
DRAWING BY FASHION ILLUSTRATOR ©SHAMEKH BLUWI
