توفت الشحرورة صباح فجر الأربعاء في 26 نوفمبر في اوتيل برازيليا في الحازمية عن عمر 87 سنة. وسيقام يوم الأحد مراسيم الدفن في بيروت في كاتدرائية مار جاورجيوس وتقبل التعازي يوم الاثنين والثلاثاء.
وكتبت إبنة شقيقتها كلودا عقل على صفحتها الخاصة على موقع فايسبوك قائلة: “يا احباب الصبوحة.. الصبوحة اليوم راجعة على ضيعتا عالأرض اللي حبّتا وحبّتا. الصبوحة اليوم راحت عالسما عند الرب الكبير راحت عند اهلا واخوتا اللي اشتاقتلن كتير. صباح الحياة، صباح الفرح، صباح الابتسامة المشرقة، دايما صباح الضحكة المرسومة باصعب الاوقات، بتودعكن وبتقلكن ما تبكو وما تزعلوا عليي وهيدي وصيتي الكن. قالتلي قوليلن يحطو دبكة ويرقصوا بدي ياه يوم فرح مش يوم حزن وبدي ياهن دايما فرحانين بوجودي وبرحيلي متل ما كنت دايما فرّحن. وقالتلي قلكن انه بتحبكن كتير وانو ضلوا تذكروها وحبوها دايماً. يا احباب الصبوحة.. الصبوحة ما عادت موجودة معنا بجسدا في هاللحظة الساعة 3 فجر اليوم طلعت روحا الى الخالق وهي نايمة، حتى في رحيلها كانت هنية ومتل النسمة وما زعجت حدا ولا تعبت حدا. الصبوحة رحلت بالجسد بس رح تضل موجودة بقلوبنا الى الابد. رح نشتقلك كتير كتير كتير يا حبيبتنا. يا ريت كان بايدنا نعطيكي كل لحظة من عمرنا ونخليكي معنا اكتر واكتر. بس هاي ارادة ربنا. منحبك صبوحة منحبك للأبد وما رح ننساكي ابداً ابداً..”
