في متجر CHANEL في باريس

أريد أسألك حاجة، بس لا تهرجين... تحبّين تاخذين العلب اللي يقدمونها في الطائرة؟ أقصد العلب الصغيرة اللي يكون بيها مربيّات وعسل؟ شخصياً، أحبّ مربّى الفريز والكرز. وإيش رايك في الشوكولاته؟ خلااااص، دااااييييت. بس فعلاً أحبّ أحتفظ بالعلب ديّة. أحياناً ما آكلها. كده أخبئها في الثلاجة وحتّى ما أخلّي أخوي يلمسها. ترى هوّ دوم يحسّ بالجوع ويريد ياكل كل حاجة تقع عليها يدّه. أقول له: أخوي ضروري تسوّي رجيم، مو عشان الشكل وبس، كمان عشان السمنة تعني كثير أمراض. بس مثل كأنّي ما أقول حاجة. يسمع وما يستمع.

إقرئي أيضاً: فساتين النجمات خلال حفل توزيع جوائز الإيمي ، في عيد ميلادها: كاتي بيري صاحبة الرموش الساحرة ، كيف تفوقت الملكة رانيا على بيللا حديد؟

يدري إنّه النصيحة مفيدة بس ما يريد يطبقها. وهوّ دحين ياكل كلّ حاجة وأنا، أريد أبكي، ما آكل أيّ حاجة. من حين رجعت من باريس وأنا أريد وزني ما يزيد غرام واحد ومقاييسي ما تزيد سنتيمتر واحد. ليش؟ الأمر ما يحتاج لسؤال. اشتريت فستان Chanel، أريد أحضر حفل زفاف صديقة قديمة. روّحت للمصدر مباشرة، لمتجر العلامة في «فوبورغ سانت أونوريه». وقفت للمرّة المية... لا، قولي للمرة الألف أمام واجهة المحلّ الأنيقة بعمارتها الحلوة. في جدّ تحسين الملابس اللي يعرضونها في الواجهات جزء من العمارة ديّة. كأنها زخارف ومنحوتات. المهم، دخلت وكل أفكار واقتراحات الموضة دخلت المكان ويّاي. عيوني ما تدري إيش تشوف. في جدّ إيش تشوف؟ يقولون Chanel كلاسيكية، وأنا أقول لهم إنها متجدّدة في كلاسيكيّتها. يعني إنها ما تخليك تحسين بالملل. ما بيه تصميم مثل الثاني. بس الفكرة واحدة: أقصى حدود الأناقة. تنقّلت بين الملابس وصرت أقول في نفسي: أحسّ بالدوار. كده مو رايحة اشتري أيّ حاجة. والسبب؟ إنّه كل الحاجات حلوة مرّة. بس عشان أقدر أختار، رجعت وقلت في نفسي: الستايلست قالت لي اختاري اللي يناسبك واللي يليق بشخصيّتك وستايلك، كده الحيرة تصير أقلّ. سوّيت جولة، سويّت جولة ثانية، ثالثة، رابعة،... وكيف أختار؟ المهم، في آخر الجولة السابعة وقعت نظراتي على فستان... انتظري، رايحة ألبسه دحين. لبسته من حين اشتريته 5 مرات، صوف وكشمير أسود. هوّ مو فستان فستان، هوّ مثل المعطف الطويل واشتريت ويّاه تنورة. في صورة الإنترنت، العارضة تلبس 3 قلادات، واحدة قصيرة كاميليا من الجلد الأبيض والأسود والثانية طويلة بيها معدن وشريط ولؤلؤ بألوان الذهبي والأسود والأبيض اللؤلئي والثالثة معدن ولؤلؤ زجاجي وستراس وراتنج بألوان الفضي والأسود والزجاجي والأبيض اللؤلئي. وأنا اخترت ديه. كأنّه الثوب ده مصمّم عشاني... المقاييس مية في المية... يعني أيّ سنتيمتر أو غرام زيادة مو مسموح. طبعاً علب الطائرات رايحة تبقى في مكانها لوقت طويل.