أشارك في دورة الــوســائل الرقميّة

سترة، تنورة وحذاء من Miu Miu


«تقدرين تتحكّمين بطريقة استخدام أولادك للآيباد!». قلت لقريبتي وهيّ قالت: «الصياح ما نفع. استخدمت الكلام الحلو والإقناع. بس من غير فايدة. يريدون يستخدمونه لساعات طويلة».

إقرئي أيضاً: كيف تستغلّين وقت فراغك بطرق مفيدة؟، زيّنــي ابتســـامتك بأحـــــــــمر شفــــــــــاه يـــــــدوم ، العباءة من التراث إلى الموضة

شربت قهوة وضحكت وقلت: «ضروري يستخدمونه عشان هيّ ديه لغة العصر. بس لازم تحدّدين الوقت. اسمعي. من أيّام سوّيت دورة عشان أعرف كيف أستخدم الوسائل الرقميّة بطريقة مفيدة. والمحاضِرة قالت إنّه النساء يلجؤون للوسائل ديه أكثر من الرجال وسألت كل واحدة إيش تستخدم وأنا قلت: «فايسبوك» و«تويتر» و«إنستغرام» ومدوّنات… وقالت إنها ما تتعجّب عشان 57% من مستخدمي «فايسبوك» همّ من النساء. وكمان إنّه كثير من رواد «إنستغرام» هم من النساء وإنه امرأة من اثنين عندها هاتف ذكي. وكمان النساء يشترون حاجات «أونلاين» أكثر من الرجال. وبعدين قدّمت دراسات وأرقام.

الوقت مرّ من غير ما أحسّ. أسلوب المحاضِرة يجذب. خلتنا نتفاعل. سألتنا: «إيش هيّ الوسائل الرقمية؟» وواحدة من البنات قالت: «فايسبوك، إنستغرام، تويتر،…» والمحاضرة شرحت: «عندك حق، بس ضروري تكون الإجابة أوضح. انتبهوا إيش رايحة أقول (هنا ابتديت أحس بالحماس). بيه الشبكات الاجتماعيّة الشخصيّة مثل «فايسبوك» و«تويتر» و«غوغل بلاس»… وبيه الشبكات المهنيّة مثل «لنكد إن» و«فياديو»،… وكمان المدوّنات والمنتديات ومواقع الصور يعني «إنستغرام» و«بينتريست» و«فليكر» والفيديو «يوتيوب» و«دايلي موشن» والوثائق مثل «سلايد شير»… ومواقع المشاركة مثل «وايكيبيديا»…

أشوف عيونكم بيها أسئلة، قالت، وأنا سألتها: «بس كلّ الوسائل ديه الناس يستخدمونها بطريقة مو مفيدة» والسؤال ده خلاها تبتسم وقالت: «سؤال حلو مرّة. طبعاً نحتاج نصحّح استخدامنا للوسائل ديه. وأريد أعلّمكم إنّه كثير نساء يستخدمونها عشان يسوون مهن جديدة. ومو كده وبس. كثير ناس اكتشفوا إنّه الوسائل ديه تساعدهم يستفيدون من كثير ماركات». وحين لاحظتْ إنّه ما حدّ يعلّق، سألت: «ما بيه سؤال؟» ومن غير ما نتكلّم عرفت إنه كلامها مفهوم. وبعدين قالت: «تقدرون تخلّون «الويب» وسيلة للدفاع عن قضيّة معيّنة، قضيّة تناسب المجتمع اللي تعيشون بيه. وكده تخرجون من حالة السلبيّة لحالة التفاعل والمشاركة. وكمان ممكن تقدمون نصائح لصديقاتكم وقريباتكم في كثير مجالات. وليه ما تنشرون روابط مفيدة وتشاركون في ندوات؟ يعني ضروري تكونون فاعلات في المنتديات. هيّ وسيلة مهمة لتعميم الفائدة في كثير حاجات. وبعدين ممكن تتشاركون المعلومات المهمة. وفي عمركم في حياتكم لا تنسون أهمية الصورة. الصورة مو عشان ناخذ إعجاب وبس، الصورة بألف كلمة. يعني، ضروري الصور اللي تنشرونها تكون وسيلة للتعليم والتربية وتنمية المجتمع والمشاعر الإنسانيّة. نقدر نخلي العالم أفضل إذا استخدمنا الوسائل الرقميّة بطريقة صحيحة». كلامها حلو مرّة وصار أحلى حين قالت إنّه الراديو احتاج لأربعين سنة والتلفزيون لـ13 سنة عشان يوصلون لـ50 مليون مستخدم. وإنه «فايسبوك» احتاج لسنة واحدة بس!

DRAWING BY

FASHION ILLUSTRATOR

©SHAMEKH BLUWI



شاركينا رأيكِ